蜜月... 窮遊芬蘭 (Day 1 - 出發篇)

 

等咗咁多個月... Plan咗咁多個月... 恨咗咁多個月...
芬蘭... 出發!!!!!!!!!

43上面個聖誕老人好襯呀!!

出發當日, 香港一D唔凍... 其實我好想佢係最凍果幾日, 衣著上面可以切合下目的地既天氣...

可惜... 都係要短袖起飛... 我又麻煩要著拖鞋上機... 搞到hand carry行李好鬼大件~

 

呢日既飛行+等轉機時間... 應該係我咁大個女最長既一次...

首先... 香港去Helsinki要11hrs... 之後係Helsinki機場等4hrs轉機去Ivalo... 而去Ivalo又要2.5hrs... Total 17.5hrs... 我做女時去德國都係14hrs咋...

 

香港去Helsinki來回機票... 一個人用45,000里換, 四個人就180,000里... 由於我一直都有儲里數既習慣, 儲下儲下... 連用八達通都儲到里數既情況下, 夠哂換四個人既來回機票... 團友夫婦亦用咗比市價平小小既價錢作買機票之用... 至於機場稅及附加費, 每人只需HK$720... 去歐洲黎講真係好扺~

(其實45,000里可以換到去歐洲既機票, 而且仲要係芬蘭, 我真係覺得好扺)

 

去到Helsinki既內陸機, 都係芬蘭航空... 原本我都打算用里數換, 不過點計都唔扺, 所以就自己買...

去程: Helsinki - Ivalo

回程: Rovaniemi - Helsinki

費用: EUR 140一個人... 全包

 

好... 上機啦... 第一次搭芬蘭航空... 上blog見人講機上好多marimekko既野... 芬蘭自家品牌... 果然好多都係... 氈, 餐具, 紙巾... 全部都係~

 

無幾耐... 就有消夜食啦... 係雞肉飯... 不過太開心無影相~

 

成程機瞓下睇下電視... 好快又食野啦~

 

今次我醒啦... 有影相... 早餐... 唔錯~

成程機最失敗既地方... 就係坐係尾排近廁所位... 經常有人排隊... 經常聽住沖廁聲... 最衰我ONLINE CHECK-IN唔夠人快... 到我選擇既時候得返中間前後有人位... 或者尾排... 為咗避免有BB喊聲或前後比人夾既情況... 後排就後排啦... 不過我係估唔到唔係旺季都咁多人去, 全機唔係好多吉位~

 

11小時... 好快就過... 連薛公子都話估唔到自己咁輕鬆過到~

 

臨落機... 我地要變身啦... 雖然Helsinki既機場全室內... 不過都真係凍... 又唔想拎咁多野... 著哂上身就最好~



寄存行李方面... 係香港上機前已同地勤交代清楚, 所以D行李會自動上內陸機~

 

跟住就係漫長既等轉機時間... 好彩機場都有野行下食下...

 





機場係有免費WI-FI服務... 而且質素唔錯... 不過我唔肯定係未好多地方都有免費WI-FI... 所以要買張卡用下...

 

呢間就係機場候機處既便利店... 電話卡就係呢度買...

 

電話卡價值EUR 7,90... 但店員話而家有優惠... EUR 4,90就買到~



 

店員只賣卡, 唔識點用... 英文又唔係幾好... 所以我地用咗一段時間先研究到點機買上網既package... 原來開通咗張卡後, 要上佢網站用信用卡買, 佢地有100MB, 500MB, 1GB 或者係Unlimited... 仲分7日... 30日... 我地就買Unlimited既30日... EUR 16,90, 扣返張卡原本有既EUR 7,90... 補EUR 9~

 

由於內陸機無食物供應... 所以上機前都食小小野... 咁就收咗我EUR 12,30... 貴貴呀!!

 

 

 

機場入面都有酒吧~

　







等了又等... 終於上機啦... 今次我就勁啦... online Check-in比我喉到逃生門位... 即係可以伸長隻腳舒舒服服咁去 Ivalo...

 

留意返... 目的地溫度係-17度... WOO... 我地就到啦... 興奮中...

 

 

 

 

 

 

 

 

 

 

 

 

 

 

 

 

 





蜜月... 窮遊芬蘭 (行程篇)

行程方面... 首先我要好多謝團友夫婦既信任及遷就... 先可以令呢次"窮遊芬蘭"成功起行~

雖然個行程唔係安排到最好, 不過我真係落咗好多好多心機去安排架... 有咩唔識就send e-mail去酒店問... 總之, 為求安排到最好~

呢個9日既行程, 改咗好多野... 就連去到當地都有改... 好彩我無焗限自己, 除咗航班日子無得改之外, 住宿交通我都係可以改動既~

首先係航班... 芬蘭航空既時間真係無得輸, 凌晨機出發, 同日一大早就到... 回程就超夜機出發, 第二日下午到香港... 完全玩足9日~

住宿方面... 由於我地4個人去, 可以住apartment... 比起2個人去慳好多... 而且apartment除咗有兩間房之外, 仲有廚房... 可以係香港帶公仔麵同罐頭去煮~ 重點, 芬蘭既住宿好多好多都可以係Booking.com訂, 而且部份可選擇去到先比錢, 或者指定日期前免費取消, 對於會改行程既我好方便...

好... 睇下我嘔心瀝血設計出黎既行程啦: 

**************************************************************************

Day 1 - 23/11/2015:

Hong Kong (HKG) – Helsinki (HEL) / AY70 00:45-05:45 (11 hrs)

Helsinki (HEL) – Ivalo (IVL) / AY0557 10:15-12:40
Ivalo – Inari

Accommodation: Hotel Inari

Day 2 - 24/11/2015:

Stay at Inari

Accommodation: Hotel Inari

Day 3 - 25/11/2015:

Stay at Inari

Accommodation: Hotel Inari

Day 4 - 26/11/2015:

07:15-10:37 Inari –Torvinen (Rovaniemi)

Torvinen – Luosto

Accommodation: Santa’s Hotel Aurora

Day 5 - 27/11/2015:

Luosto – Rovaniemi 10:40-12:48

Accommodation: Santa Claus Holiday Village

 
Day 6 - 28/11/2015:

Santa Claus Holiday Village

Rovaniemi (RNV) – Helsinki (HEL) AY0430 18:10-19:25

Accommodation: Aallonkoti Apartment Hotel

 

Day 7 - 29/11/2015:

Helsinki

Accommodation: Aallonkoti Apartment Hotel

 

Day 8 - 30/11/2015:

Helsinki – Tallinn 08:30-11:00 by Cruises

Accommodation: Adelle Apartment

 

Day 9 - 1/12/2015:

Tallinn – Helsinki 12:00-14:30 by Cruises

Helsinki – Airport 20:30-20:55

Helsinki (HEL) – Hong Kong (HKG) AY069 23:40-15:30 (9h 50mins)

**************************************************************************

行程上, 我唔會焗限自己邊日一定要去邊個景點... 因為我地4個都鍾意hea玩, 去到邊玩到邊, 邊度好玩就玩耐D, 唔好玩就走人... 所以行程上只有地方名, 至於會玩乜, 睇乜... 到時先算啦~

蜜月... 窮遊芬蘭 (裝備篇)

歐洲... 對於我黎講好陌生...

去台灣, 沙巴... 我可以好快咁安排好哂行程交通住宿...

歐洲... 我真係唔熟...

今次仲要去一個咁與別不同既地方...

天寒地冷... 人生路不熟... 要考慮點保暖... 點食野... 交通安排... 行程點行... 開支等等...

要明白... 我同薛公子銀兩非常有限... 要我地買有牌子既保暖服裝...

失禮講句... 我地連NIKKO超特價都買唔起...

好彩... 我地有天大既祖國撐住... 淘寶... 睇到盲都要睇!!

當然... 淘寶既質素時好時壞... 我去到果邊出咗事再係當地買未好大件事... 所以我有兩手準... 除咗外套... 所有用品我都打孖上... 不過, 淘寶真係無令我失望, 又或者係我好彩買到好野... 我同薛公子係成個旅程都好夠暖, 仲超出我地預期既好~

11月既芬蘭唔算太凍... 一般唔會超過-20度...

由頭到腳, 最最最重要係防風防水... 大風落雪都無有怕~

開始介紹我既戰利品:

芬蘭室外地方凍... 不過室內車內開哂暖氣, 所以裝束方面, 上身以外套為主... 務求係室內除得就除, 出返室外就著得就著~

1) 戶外鯊魚皮軟殼抓絨衝鋒衣 ¥138

 

呢款抓絨衝鋒衣... 我真係搵咗好耐先搵到... 佢不但防風防水保暖... 仲要設計靚仔... 返香港都仲著得返... 唔會浪費... 而且仲要咁平... 買件T-Shirt都唔止啦... 有佢做底果件外套, 羽絨背心都唔駛著呀!!

2) 外貿原單牛貨 防水防風加厚保暖大碼外套 ¥125.90

呢件外套... 唔駛講, 只係睇都知勁野... 著住佢... 真係暖到出汗... 我地可以盡情瞓雪地... 玩雪... 基本上有佢著係面, 真係唔識凍.... 就算係香港無乜機會著返... 不過價錢好吸引... 咁大件唔夠靚仔都殺!!

3) 外貿原單尾單 男女通穿 加厚專業寬松滑雪褲子 ¥49

下身方面... 只係呢款滑雪褲已經夠用... 都係果句... 防風防水已經足夠... 當然入面我仲有著Legging打底, 再凍D就加多對絲襪... 一入到室內頂唔順就除咗呢條滑雪褲... 薛公子就係Uniqlo買保暖褲打底, 佢話效果一流~

4) 加厚保暖羊毛襪  ¥45.94 (8對)

羊毛襪... 一定走唔甩... 呢個平靚正... 8對只係4X幾蚊人仔... 當時我買有優惠買3送1... 真係著完唔洗用完即棄都抵~

5) 3M新雪麗 保暖 防水 防滑 耐磨 高筒 雪地靴 ¥91.80 (女裝)

鞋... 係我最擔心既... 因為消耗性最高... 萬一佢頂唔住甩鞋底就好大獲... 所以我每人預備兩對~
呢對... 真心推介... 我同團友太太都有買... 亦都係我地為芬蘭第一件買入既淘寶貨... 收到之後, 簡直係不能相信品質咁好... 好到我地既雀友見到都買埋一份, 拎去韓國著... 當然, 大家賽後檢討, 無論芬蘭定韓國, 都無得輸... 我而家仲有KEEP住留返下次著~ 不過一提, 呢款鞋入面有毛毛, 我又著厚羊毛襪, 所以我係買大咗兩個SIZE...

6) 防水原單滑雪靴 ¥85 (女裝)

頭先果對係有鞋帶既... 由於係雪地唔係成日都方荏綁鞋帶, 所以第二對我選擇無鞋帶既... 由於無鞋帶, 呢對係我成個旅程著得最多既... 方便, 又輕, 保暖, 防水...

7) 外貿原單男士真皮戶外保暖雪地靴 ¥72 (男裝)

薛公子呢對... 真係一鞋走天涯... 雖然未淘寶之前, 我同佢去咗NIKKO開倉用HK$250買咗對高筒行山鞋... 拎到過去, 佢只係夠呢對淘貨已經夠哂... 防水, 防滑, 保暖... 仲要好實淨~

8) 男女戶外旅遊冬季保暖防風保暖滑雪登山騎行手套 ¥31.20

今次既旅程, 我無打算滑雪, 所以手套會以最方便為主... 因為又要影相, 又用電話... 太大太厚既手套好唔方便... 呢款算係唔錯既選擇, 除咗之後唔阻地方收藏... 基本既防水防風都做到, 不過保暖就唔係最好... 太凍我都要收埋對手入衫袋... 有得有失啦... 質量我同薛公子果對都無問題, 係團友果對就唔好彩, 第三日就爆線... 淘寶野, 雖然一齊買, 真係睇彩數~

9) 抓絨滑雪圍脖帽子面罩 ¥23.80

 

由於擔心會大風, 而且睇BLOG個個都買面罩, 所以我地都有買, 最後買咗呢款... 成個行程, 我同薛公子完全無用過, 不過平平地做Back Up都唔錯~

 

淘寶真係一個你肯用心機, 就會搵到好野既地方... 本來我都想POST LINK, 不過買完幾個月後既今日, 我發現好多野而家已經無得賣, 所以日後想學我咁慳錢, 就要努力自己搵好野啦~

 

P.S. 我真係慳錢慳到盡... 團友先生一星期要返大陸工作幾日, 所以佢好好咁幫我將物資拎返香港, 令我慳咗唔小運費~

蜜月... 蜜月...

上文提及... 已經好耐無寫BLOG...

呢段期間... 總唔可能日日都係唔開心...

吊頸都要透下氣架...

而且... 結婚後都無度蜜月...

坦白... 如果去台灣澳門就當係蜜月旅行... 真係... 唔好啦!!

結婚一年後... 即上年年尾... 2015年11月尾...

經過我死計爛計... 死度爛度...

係用咗唔超過HK$半萬既情況下... 我同薛公子... 再撩多一對好友衝出亞洲...

去到世界好北既地方... 芬蘭!!!!!!!


用咗唔超過HK$半萬既情況下?? 無錯... 兩個人計呀!!! (我同薛公子咋... 友人就...!!!)

我都話... 天無絕人之路...

個天永遠都唔會封哂你路!!

為咗呢個旅程... 我睇BLOG睇資料睇酒店再睇行程... 真係睇到眼都盲...

無錢就當然要付出多D啦... 而且我仲要係搞手... 我撩人去玩...

回顧返... 真係好開心... 好enjoy!!

開心事.. 開心睇... 別人既閑言閑語... 一於當佢唱歌!!!

無錢就唔可以去旅行架啦咩?
無錢就要係屋企等運到等跳樓?
無錢唔可以去放鬆自己架咩?

我要放假!!!!!!!

Long Time No See!!!

呼... 不經不覺... 原來已經一年零九個月無寫BLOG...

對上一次寫... 已經係結婚前... 薛公子既準太太~

估唔到今日再寫... 已經係結婚後... 薛小B既準媽咪~

呢一年零九個月真係過得"精彩"... 人生既上上落落... 人性既真面目... 生離死別... 我同薛公子真係大開眼界!!

無論點... 日子總要過... 我無怒天... 無怒地... 反而感恩...

人生... 無可能一世都順風順水...

感恩... 我身邊既人個個都和和氣氣...

感恩... 面對既主要係錢財問題...

感恩... 見到身邊既人成長...

感恩... 一家人團結一致... 雖然有時都會嗌下交... 不過瞓醒就無事...

感恩... 比我自閉既朋友...

感恩... 工作上無限支持及信任既上司...

感恩... 薛公子同我無因為唔開心既事不和... 意見永遠一致...

感恩... 我相信天主唔會安排一D我地應付唔到既事, 比我地面對...

困難既日子邊個無? 勇敢積極面對, 總有一日, 一定會過~