蜜月... 窮遊芬蘭 (Day 1 - 追蹤北極光篇)

補完眠... 又要出動啦!!
(奇怪... 明明去既時候影咗好多相準備寫BLOG用... 相隔幾個月... 好多相唔見咗... 唯有文字補充啦!!)

首先... 我地去咗酒店既Service Counter查詢睇北極光情況, 當初選擇呢間酒店, 因為如果天氣好既話, 就咁行出湖邊就睇到, 唔駛join local tour... 慳好多~

點知... 臨出發睇天氣預測... 成個行程個天得今日好小小, 雲最小... 再問職員, 佢地話前一日都睇唔到... 不過... 有班客join咗個去北好多既tour就睇到... 聽一聽下就原來北到去挪威... 揸車都要4個小時... 職員仲話, 未來呢幾日, 今日最有機會睇到架啦... 之後你比錢佢地都唔出團, 因為天氣唔好...

山長水遠黎到, 無理由唔好好珍惜呢個機會架... 所以, 我地就忍痛每人拎咗190 EUR join tour睇極光 (條友比個file我地睇, 個tour原價要2XX EUR, 而家優惠價198 EUR比我地, 我再叫佢比多D discount我地, 因為有4個人... 佢最後就收我地每人190EUR... 多人去真好~)

Tour 7pm先出發... 時間尚早, 又剛剛用咗咁多錢... 就返房煮香港帶去既出前一丁及罐頭食~ 返房前... 我地走咗過對面間supermarket睇下, 預算呢4日3夜既糧食安排...

嘩... 去到呢間K supermarket好開心, 入面好大好多食材選擇, 而且價錢非常合理... 突然有D覺得自己好傻仔, 帶咁多出前一丁, 即食咖哩, 罐頭, 湯包等等去...

不過, 今晚真係要慳住... join tour用得太多$$$$$$... 但我地都買咁舊芝士, 水及啤酒返去~

食飽飽... 準備出發... 今次旅程意外地會去挪威... 個人又未適應到時差... 補眠又不足... 挪威又肯定凍好多... 我真係盡自己方法著最多既衫出發...

出發... 導遊哥哥自己負責揸車帶我地出發, 成團得我地4個人~

沿途好黑... 黑到咩都睇唔到... 我忍唔住又瞓咗啦~

中途... 導遊哥哥落車帶我地去咗條溪間邊, 叫我地試飲溪間D水.... 好清, 不過好凍... 應該係我呢世人飲過最凍既凍水~

飲完成個人醒哂... 導遊哥哥繼續揸車向北行...

過咗唔知幾耐... 去到一個農場, 周圍都黑漆漆... 只係靠月光睇到周圍既景象...

見到月光... 即係見到北極光既機會又減低啦... 因為個天唔夠黑... 而且... 個天呢一刻勁多雲... 唉... 凶多吉少啦!!!

導遊哥哥見唔對路, 又揸車去另一個地方踫下運氣... 但都係無野睇~

最後... 導遊哥哥係一條無人既馬路停車, 開壇比我地燒腸仔食... 再比杯熱茶我地飲~

嘩... 呢度真係凍到我唔識形容... 我D牙係咁震... 我食完就拿拿聲跳上車...

回程中.... 經過油站... -19度... 頭先我地落車既地方, 肯定凍多2-3度!!!

我地就係坐呢個VAN架啦... 成個油站得我地一架車...

嗚............. 追蹤北極光...................失敗!!!!