遊記 - 點解我會去十次... 沙巴亞庇 (Day 3 - Grand Borneo + Velvet + Kama'a)

同陽光玩完遊戲... 又去check-in先~

Borneo呢邊... 主要係夠一個大型shopping mall... 講真, 要食野, 呢邊無乜特別, shopping係唔係香港人杯茶... 真係純粹住比市區平少少~

我已經唔係揀旺季去旅行... 點解周圍都咁爆... 爆到酒店要upgrade我去套房~

Room View

hm... 房入面無wifi... 有好有唔好啦... 而且, 始終唔係新酒店, 點都有少少舊&污濁既感覺~

沖返個靚涼... 去食飯!!

去咗KK咁多次... 第一次食呢度既西餐... 今次去VELVET, 係因為聽閒佢地既大廚, 之前係吉隆坡某間大酒店做大廚... 所以, 我呢個小老闆都去偷下師先~

呢間VELVET上層係西餐廳, 仲有個OUTDOOR位比人飲紅酒... 而下層就係酒BAR, 仲有LIVE BAND架... 食飽同朋友落樓下飲返杯都幾唔錯~

前菜: 雞肝醬+菠蘿醬配吐司麵包... 呢個醬好好味, 好得意~

湯... 有蕃茄, 蘑菇... 好味~

SALAD... 呢個我唔記得個名啦... 不過, 佢辣辣地, 好得意~

                      

豬呀... 大馬係回教徒國家... 真係勁小地方有豬食~

食西餐... 緊係要食鵝肝~

焗蠔... 上面仲有鵝肝... 好豐富!!

呢個意粉好有新意... 係用冬陰公煮既... 又泰又西~

煎三文魚... 看似好簡單... 其實呢味菜比煎牛扒難... 我記得自己以前係唔會叫煎三文魚食, 因為真係以為係好普通既野... 有一次, 係自己餐廳, 有個外國人點煎三文魚, 拍明要三成熟, 我心諗: 唔係嘛... 呢個唔係牛扒喎... 於是, 我就問我既總廚"阿大", 佢話真係唔係隻隻三文魚都可以咁生賣出街... 好彩係我地餐廳入咗隻唔錯既三文魚, 最後, 個外國人一個星期黎食3-4次...

之後... 我忍唔住自己食一份三成熟既三文魚... 原來, 真係好正架... 得個面係熟既, 中間唔熟, 好滑, 唔"鞋"之餘仲好香口~

呢間既三文魚就太熟啦... 如果整到三成熟(下次我會自己提出)... 一定會好正~ 

牛扒... 好牛... 好正!! 都係果句, 生D仲正~

再黎個自家制雪芭做甜品... 正!!

VELVET既野真係大件夾抵食... D main平均都係廿幾蚊馬幣一樣, 唔錯唔錯... 香港食唔到咁平... 而且位置又方便, 就係waterfront對面, 下次我唔駛人帶都自己識去~

食飽飽... 就到咗梳乎既時間啦!!

好鍾意KAMA'A開到凌晨, 等我地日頭多D時間去玩, 夜晚就慢慢梳乎~

今次我地去咗佢既新店... 上次我去舊店時已覺得不錯, 今次去新店都忍唔住"嘩"咗出黎, 好大, 又舒服... 而且服務比上一次更貼心~

有好多間房呀!!

一般雙人房~

可以齋做腳底按摩...

薛公子哦咗好耐話要按摩... 所以我地就豪D join個有SPA, 有facial既plan梳乎下~

我地既VIP雙人房~

全程玩足3.5個鐘... 有足浴, 全身磨砂, SPA, 60mins香薰按摩, facial, 腳底按摩... 真係由頭梳乎到落腳... 不得不提佢地既小食... 有生果, 仲有個好好味既蜜瓜布甸... 要睇果個地方用唔用心, 食物就扮演緊一個好重要既角色...

我地梳乎完都凌晨兩點幾啦... 佢地仲有車車我地返唔近市區既酒店, 真係好呀!! 不過, 如果有得提供刷牙服務就好啦... 食完野個口唔夠fresh~

Kama'a
No.3-32, 3/F, Kompleks Asia City, Phase II A, Kota Kinabalu